ඝන ආහාර ආරම්භ කිරීමට පෙර අම්මලා දැනගත යුතුම රහස් 5ක්!
බබෙක් ඉපදුණු දවසේ ඉඳන් අම්මා කෙනෙක් හීන දකින්නේ තමන්ගේ අතින් බබාට මුල්ම බත් කට කවන දවස ගැනයි. මාස 6ක් යනතුරු මව්කිරි පමණක් ලබා දුන් ඔබේ බිළිඳාට ඝන ආහාර හඳුන්වා දීම ජීවිතයේ වැදගත් සන්ධිස්ථානයක්. මේ ඒ ගැන ඔබ දැනගත යුතුම කරුණු කිහිපයකි:
- බබා ආහාර ගැනීමට සූදානම්දැයි හඳුනා ගන්න:
මාස 6 සම්පූර්ණ වීම වගේම බබා ආහාරයට සූදානම් බව පෙන්වන ලක්ෂණ කිහිපයක් තිබේ. තනිවම කෙළින් වාඩි වී සිටීමට හැකි වීම, අතට අහුවෙන දේ කටේ දමා ගැනීමට උත්සාහ කිරීම සහ ඔබ කෑම කන දෙස උනන්දුවෙන් බලා සිටීම ඒ අතර ප්රධානයි. - ආරම්භය ඉතාම සරල විය යුතුයි:
මුල්ම දින කිහිපයේදී බබාට ලබා දිය යුත්තේ ඉතාම මෘදු ලෙස පොඩි කරගත් (Pureed) ආහාරයි. රතු නිවුඩු බත් කැඳ, තම්බා පොඩි කරගත් පැපොල්, කෙසෙල්, අලිගැටපේර හෝ තම්බා ගත් කැරට්, වට්ටක්කා වැනි එළවළු මේ සඳහා ඉතාම සුදුසුයි. - “දින තුනේ රීතිය” (The 3 Day Rule):
ඕනෑම අලුත් ආහාරයක් හඳුන්වා දීමේදී එය දින 3ක් එක දිගට ලබා දෙන්න. වෙනත් අලුත් ආහාරයක් ඒ සමඟ මිශ්ර නොකරන්න. එමගින් එම ආහාරය බබාට අසාත්මික (Allergy) වේදැයි ඔබට පහසුවෙන් හඳුනාගත හැකියි. - සීනි සහ ලුණු එපාම එපා!:
බබාට වයස අවුරුද්දක් පිරෙන තුරු කිසිම ආහාරයකට ලුණු හෝ සීනි එකතු කරන්න එපා. බබාගේ වකුගඩු වලට ලුණු දරාගත නොහැකි අතර, සීනි නිසා කුඩා කාලයේදීම දත් දිරායාම සහ අනවශ්ය ලෙස බර වැඩි වීම සිදු විය හැකියි. - බලෙන් කැවීමෙන් වළකින්න:
මුල් කාලයේදී බබා කන්නේ ඉතාම ස්වල්පයකි. එය සාමාන්ය දෙයකි. බබා කෑම ප්රතික්ෂේප කරයි නම් බලෙන් කවන්න එපා. ආහාර වේල ප්රීතිමත් වෙලාවක් බවට පත් කරන්න.
අම්මලාට පණිවිඩයක්: ඝන ආහාර පටන් ගත්තත් අවුරුද්දක් යනතුරු බබාගේ ප්රධාන පෝෂණය මව්කිරි බව අමතක කරන්න එපා.
